Batao, dhoondoge mujhe?

Chalo aj ek khel khelte hain
Mai kahi chhup jata hu, aur tum mujhe dhoondo
Khel mein hi sahi, bekaraar toh tum bhi hoge mujhe paane ke liye
Phir haar jaane ka gamm na hoga mujhe, tumhari uss bekaraari ka hausla jo milega mujhe
Pal bhar ke liye hi sahi, ulfat mein na sahi
Tishnagi dikhegi tumhari aankho mein mujhe
Phir chaahe hamari zameen mil jae, ya aasmaan aakar tumhare kaan mein phus-phusaye
Dhoond toh loge hi tum mujhe
Aur iss tarah, khel mein hi sahi, ulfat mein na sahi
Puri kaiynaat jutt jayegi hume milaane ke liye
Chalo phir, shuru karte hain
Mai kahi chhup jata hu, aur tum mujhe dhoondo!

Kaun hu mai?

Ik bawaal hu, toofan hu,
Phir bhi bemisaal hu mai
Teri khamoshi mein chupa hua raaz hu mai
Sardi ki vo chai ki piyali hu, garmi mein aag ki chingari bhi hu
Tere mann mein chal rahi kashmakash hu mai
Pura jo na ho saka tera vo khwaab hu,
Besahara ki ibadat hu mai, khuda ki di hui ijazat hu mai
Ansuna pyar ka vo nagma hu, ooncha hu, phir bhi ansuna hu mai,
Aakhiri biscuit ko churane ki hoshiyaari hu, jaate hue ko na rokne ki nasamjhi bhi hu mai
Tere dil ke ik kone mein bana khandar hu mai, phir bhi tujhe lagta khoobsurat hu mai
Maan ya na maan, tera hi vajood hu mai!